425 jahačof alkoholipse
Moja gajba i ja i draga puna pive.. Ludi moji, kaj se ovo događa, a de smo stali ono, a, ... Jel se planet Nubiru strknul z Božicum Sreče pak su z dekadnoga prek kubnoga završili na kvantnomu svemiru il je kadet jajce trknul pri Trsišču cucka Žuču dok se of spravlal za medeno mesečarenje ja ne bi znal ali ... Da se Liga otpira na `Ojtne za se *darije je krivo "Kravino sedlo" ali da se Liga otpira pri Kravarščice zna se da je igrališče nagrajeno z 549 nagrade za najbole igrališče znači da objekt nemre biti krif onda se si loviju subjekta, i to za "grčku". Ludski faktor bu jenoga dana kvalitetno popil šore, šteli mi to il ne. Si su pomalo postali svesni da se Liga ne dobiva v zajdnem kolu, jel v zajdnem kolu popravka ni, nek f prevem. A pri svesnosti obotem pojmu si nastojiju startati hipersonično ali samo se retki domogneju te žele i brzine. Drugi završiju z 200 kune mejne v žepu, po pitajnu Žalbe, il z dve minute po pitajnu "subjektivnoga dojma" i "verbalnoga delikta". Kaj čoveka, dobro, ne samo čoveka nek i Kurilovčana, veseli je da su nove generacije navijačic stasale za Ligu da se samo postavla retoričko pitajne jel je to endemska vrsta rezerverana samo za Gorni mi ga Ruševec il se bumo "očno" pasli i drugde. Da smo več pri endemskemi vrstami i srodnemi rodi i padeži, ono kaj je pred dve lete zgledalo kak kata-strofa, a, bome i na letošnem Plenumu ni dalo bog-te-pitaj kakve optimistične primisli, na Ruševcu se pokazalo kak promašaj. Kaj pijana zalokana budala z Kurilovca kaj piše bedastoče da pije kolu oče z tem povedati? Počele su se vračati lastavice z juga, legende, otpisani, bivši, endemske vrste i autohtoni subjekti. Letos, na početku Lige, čovek, more biti zadovolen, viđenem... Da ne velim, zadovolen. Kak je to zgledalo da se riba zove "list";..
Jako (pre)motiverani, iako su i drugi bili isto tak jako motiverani, Robijaši su istoga momenta, da ne velim mam, iskali ekstra slikajne za enciklopediju nogometa. Peki je kazal zavidne bravure z visokem naglaskom na obranu z slepem okom i levum obrvum ali funkcionalni nedostatek mase i volumioznisti je zel svoje. A, da! Novi dresi! Mustra INA Rafinerija Sisek. To sigurno ne prešlo nezamečeno i nezapamečeno, med navijačicani, v Kongu, Čileu, Obale oglodane belokosti i Ban Gladešu. Kak su ovi Obadi pustili ze svega jata maloga Zlodiča nejde mi v glavu niti z pištolom za svijne tuči. Mali je sretno odsel pri Švabi (a mogel je i med Irci).
Tesari v nepoznatem Č-sastavu imali su prilike upoznati Glumce v M3-sastavu. Obično da nova ekipa vlezne v Brešku ligu prvi jem je problem aklimatizerati se na proporcije, pravila, zakone, ustaf i poslovnik. Zgleda da je početnička sreča počela pomalo * i Glumce; da prvo poluvreme završi z 7-7 v fauli sigurno je znak za opču uzbunu v Ustafnem sudu. Na su sreču drugo nam je polunevreme doneslo kamilicu za gablec pak se to se pomalo kultiveralo.
Nije čuča na prodaju, ni čuča ni prikolica; popeval je negda Milodrag Ugurguzovič. Neno je napravil opču mobilizaciju v selu i semi zaselki kaj magnetizeraju, koaleraju i graviteraju k Dubrajncu da mu se ne trefi "Črni labud f gostima". Žac je daval moralnu samozatajnu podršku. Počele su se vračati "zgublene nade"; Joža se ni (pre)prodal Tesarom nek stoji na dispozicije svoje (pra)stare ekipe, z Leve Štefankov i zemle nedođije vrnul se Šeki, neobrcki zet, kaj bi nekteri nazvali srečum, dok se drugi nebi složili žnemi. Po pitajnu žgaravice, krvnoga tlaka i očnoga zapalenja. Puleni DVD-a Cerovski Vrh nisu mejnali puno, skoro bi povedal niš, jel ekipa kaj pobeđiva, ak pobeđiva, se ne mejna. Čak je i Tomica donesel čvrstu odluku v Korizme da se letos bu odrekel nogometajna, ak Bok drugač ne veli. Se je v negvemi rukami. I Reči. Mali neurozni Lukafčan je napravil više koristi nek štete tak da mu nekteri moraju spustiti škrlak do zemle. Ni bilo potrebe, ni trebe, da se v igre švica Messi, OnajKajSamumSvojumNazočnoščuRešavaUtakmice. Ilovača ni opala, a da bu, nezna se.
Gospari su si z Divje dubrovačke vaterpolo lige donesli maske za ronjenje da se skrijeju od sveta. Sekaj, kak da je mi ne poznamo... I novi dresi, i novi sponzori. Ruška te Zimača v čelo kušnula, kak prava ekipa. Prad par se mesec povedalo da nima do igrati, je, ziher, nekteri glumci su se bole i više držali klupi i pive nek nogometajna, valda misliju da budu tak prije zdigli spomenik palomu borcu, Medo se počel više baviti z reproduktivnemi sporti, Šan-Ku si je rašarafil kolena... Izbornica je pala... To opče nima veze da Osvetnik Zoro z brojem 10 razdrapi neprijatelsku mrežu kak japansku ižu od papera z krampom. Origami, tatami i tak to. A ak je Šan-Ku rašaraflen kak tek onda zgleda da je zašaraflen!? Nueva Brdo si je jednak tak priskrbelo nove drese a, bome, dobro su i došli Števini grbi z fejsa za nakititi iste. Taman da je prešireni stručni stožer z Nou Campa povedal da nima do prijnemi dati gola of kaj je ocenen kak nemočen ga je vrgel, rekel bi Mile; ko pas majci. Poštar mi je na poštede; il ga žuli * il nimaju broja dresa zajnega...
I Šika si je priskrbela nove drese. Kak bi vam povedal..? Najbole; "Strezujevo negativ". Ali ni samo tu problem... Odkad su bili na ekskurzije v Crne Gore si su se pokumili uzduž i poprek; kum prek kuma, nemreš veruvati, kak ni v drveni šporet. Mamič je imal problemov, v * te *; kak pokrpati ekipu da je frtal fali. Zlodi je došel, pod sumlivemi okolnosti, ali nemre on sam rešiti utakmicu, kak ni bicka od 300 kil. Tuta dela čudesa božja, nogometne abortuse, od obrane do napada, zgubi loptu v napadu i stigne još obraniti na svem golu, vuz malu pomoč "maloga od Supermena", Tona vrača istum merum. Jedino Rakič nema pandana z druge strane. Brajkovič bros dela punum parum ali nejde kak ni tate Želku naivna umetnost.
Došli su navijači, il nabijači, Tigričef z organizeranem vanrednem prevozom v Brajkovu autonomiju da bi potšprajcali svoje pulene. Čak se i Mali z šume zlekel. Mega su Kurilovčana jednak tak dočarili na poprište bitke. Ali! Velim, ali! Kaj je se Pek uspel mobilizerati graniči z naučnum fantastikum, praksum urote i otmicami ovozemalcov. Jedino se Jole ni pojavil, zajdne vesti povedaju da su ga negde f šume oteli partizani. Suma sumarum, krem de la krem veteranof kontra isto takove kreme juniorov OFK Kupe. Pitajne je bilo do bu postal posle utakmice krem de la cipele ovem drugem. V drugem se poluvremenu utakmica otprela kak krafska * na telenju. Šumari sufleraju Malomu da otkopči prikolicu, ali ludi moji, oni nisu svesni da nega * statika. Naprovo ima gevigte a zabil je zakopčiti pluge. Posle se lepo popilo, nema kaj.
Dok Precednika ni jel je na pripremami z OFK Goricum v Gornem Levom Neobedišču negovi "mali od kujne" su počeli delati *darije. Najprije su si dali naštampati majce z "K`ZJAČA", z takvemi je sigurno nebi pustili na Bleiburg. Onda su bivši ovčari počeli delati rajčulu tak da je malo falelo da je sudačka dvojka ne eutanazera z elektrošokerom z utakmice. "Trokrilni ormar" ni `zostal tak da smo bili spašeni od maratonske tonske probe. Ali! Velim, ali! Zagi je v Švicarske v zatvoru. Tam hobla drvene žlice i dela Lipovica radijatore. Do bi ga mogel zameniti? Jedino Majoneza, kaj je Šebeku na oči mast vadil. Da bi se štel zlagati onak kak ja najbole znam povedal bi da je utakmica bila repriza letošne z Trsišča. Krvi do kolena, blata od kolena. Ali! Niti blizu. Leptiriči su kolo vodili. Šuki je došel još jutro posle zornice da dobro snimi protivnika. Kak "Družina spod Križnoga brega" ima stanovite probleme z (KVS) kvalificeranum radnum snagum tak je v igru dospel moj Ivica kaj se pokazalo kak pravi pogodek v tandemu z prijespomenutum kravarskum snejum. Kak negda v Reke Barnabás Sztipánovics i Igor Musa. Skupa vrediju za tri igrače, saki sam niti za pol. Na su sreču Leptiriči imaju sreču v nesreče da imaju golamanov na hitajne. Inače...
Fali Brebričef, ima je ali je fali... Valda su pak v Grčke... Buduči da se si v prvem kolu rivleju kak rubača v rit ovo malo i čudi ali... Črni se zdigel z (nogometno) mrtve. Lani se grozil da više ne ali kaj je pamet kontra srca? Kak gume i mator. Jel moram pak povedati; novi dresi? Kak na modne revije, Nosiju se kak mladenka zamuš. Da ovo izbeglice vidiju mesec bi se dan ober slike plakali. Limuni držiju tri bode v ruke kak dekla vrapca a onda je jemle penalizacija v zajdne minute. Ma, kaj minute, sekunde.
Najte kaj zameriti. Do se još po istine pomogel...
Ne budi vam potuženo...
